शिक्षण : – BE (Mechanical) & MBA (Marketing)

का कुणास ठाऊक पण या पोरकट मनाला जमीनीपेक्षा, अंतराळाचंच जास्त वेड लागलं…! सावरकर म्हणतात___“कोणत्या हेतूने वा हेतुवाचून हे जगड्व्याळ विश्व प्रेरित झाले ते मनुष्याला तर्किता देखील येणे शक्य नाही. जाणता येणे तेवढे शक्य आहे”.  आज आपल्यातील कित्येकजण परीक्षांच्या, मार्कांच्या,नोकऱ्यांच्या व्यवहारी दुनियेत अक्षरशः गुंतून गेलेत. परिणामतः एकेकाळी आकाशातील लुकलूकणाऱ्या ताऱ्यांकडे, विश्वातील आनंतावधी सृष्टीचमत्कारांकडे, अगदी कुतूहुलाने पाहणारे डोळे मात्र काळानुरूप बोथट अन व्यवहारी झाले. 

माऊली म्हणतात नं “शब्द मावळलिया निवांत निजे”. एकदा की आसपासच्या गोष्टींबद्दल मनाला पडणारे सहस्रावधी प्रश्न मावळले की मग, उरतो तो आसपासच्या जगात फक्त profit अन loss पाहणारा मेंदू. अब्जावधी वर्ष वयोमान असलेल्या विश्वातील अगणित ताऱ्यांपैकी, कुण्या एका ताऱ्याच्या छत्रछायेत वसणाऱ्या, एका लहान ग्रहावर ६०-८० वर्ष चाललेला, शून्यातून उदयास येऊन शून्यात विलीन होण्यापर्यंतचा संघर्ष म्हणजे माझा जीवनप्रवास.

आयुष्याच्या प्रवासाला पुस्तकरूपी मित्राची साथ लाभली. शिवाजी महाराज, भगतसिंग, सावरकर यांसारख्या विभूतींनी मनावर अधिराज्य गाजवलं. खगोलशास्त्र, क्वांटम फिजिक्स मधील प्रश्नांनी कित्येक रात्री झोपू दिलं नाही. रात्री बेरात्री 2-3 वाजेपर्यंत वाचन आता नेहमीचंच झालंय. शिवाजी महाराजांचा इतिहास नेमका जाणून घेण्यासाठी पावलं कधी डोंगर, दऱ्यांकडे वळली कळलं सुद्धा नाही. वेळ मिळाला की दोन – चार दिवस सह्याद्रीच्या कुशीत मनसोक्त हिंडायचं, कधी आठवणींच्या रूपाने तर कधी छायाचित्रात ते क्षण टिपून ठेवायचे हाही आवडतीचा छंद.

 वाचायला आवडतं, म्हणून लेखणीची आवड लागली. खगोलशास्त्र, भारतीय स्वातंत्र्य समर, विज्ञान, क्रांतिकारक, शिवराय यांसारख्या विषयांची माहिती तोडक्या मोडक्या शब्दांत पोहचवण्यासाठी हा प्रपंच !